ބޯޑަރ ކޮންޓްރޯލް ނިޒާމާއި ބެހޭ މެމޮރަންޑަމް އޮފް އިންޓެންޝަންގައި ސޮއިކުރައްވައިފި

އެމެރިކާ ސަރުކާރުގެ ހިލޭ އެހީގެ ދަށުން ރާއްޖޭގައި ޤާއިމްކުރެވޭ ބޯޑަރ ކޮންޓްރޯލް ނިޒާމާއި ބެހޭ މެމޮރަންޑަމް އޮފް އިންޓެންޝަންގައި ދެ ޤައުމުން މިއަދު ސޮއިކޮށްފިއެވެ.

ކޯސްޓްގާޑް ބިލްޑިންގައި މިކަމަށްޓަކައި ބޭއްވުނު ޚާއްޞަ ރަސްމިއްޔާތެއްގައި ދިވެހި ސަރުކާރުގެ ފަރާތުން މިމެމޮރަންޑަމްގައި ސޮއިކުރެއްވީ މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރިޓީ ކާނަލް (ރޓ) މުޙައްމަދު ނާޒިމްއެވެ. އެމެރިކާ ސަރުކާރުގެ ފަރާތުން ސޮއިކުރެއްވީ އެޤައުމުން ސްރީލަންކާއަށާއި ރާއްޖެއަށް ކަނޑައަޅާފައި ހުންނަވާ އެމްބެސެޑަރ ހަރ އެކްސެލެންސީ މިޝެލް ޖޭ ސިސޮންއެވެ.

އެމެރިކާ ސަރުކާރުގެ ފަރާތުން ރާއްޖޭގައި ޤާއިމްކުރުމަށް ހަމަޖެހިފައިވާ ބޯޑަރ ކޮންޓްރޯލް ނިޒާމަކީ، އެޤައުމުގެ ވަރަށް ގިނަ އެންޓްރީ އަދި އެގްޒިޓް ޕޮއިންޓްތަކުގެ އިތުރުން ދުނިޔޭގެ އެކިކަންކޮޅުތަކުގައި ފުޅާ ދާއިރާއެއްގައި ބޭނުންކުރެވެމުންދާ ޕަރސަނަލް އައިޑެންޓިފިކޭޝަން، ސެކިއޯ ކޮމްޕޭރިޒަމް އެންޑް އިވެލުއޭޝަން ސިސްޓަމެވެ. މިނިޒާމް ޤާއިމްކުރުމުން ރާއްޖެއަށް އެތެރެވާ އަދި ބޭރުވާ މީހުން މޮނިޓަރކުރުމުގެ މަސައްކަތް މިހާރަށްވުރެ ފުރިހަމައަށް ކުރެވޭނެއެވެ. މިއަދު ސޮއިކުރެވުނު މެމޮރަންޑަމް އޮފް އިންޓެންޝަންގެ ދަށުން އެމެރިކާ ސަރުކާރުން މިނިޒާމް ޤާއިމްކޮށްދިނުމުގެ އިތުރުން ރާއްޖޭގައި މިނިޒާމް ބޭނުންކުރާނެ މުވައްޒަފުން ތަމްރީނުކުރުމާއި ސިސްޓަމް މެއިންޓެއިންކޮށް ބެލެހެއްޓުމާއި އަޕްގްރޭޑް ކުރުމުގައިވެސް އެހީތެރިކަން ލިބޭނެއެވެ. ރާއްޖެއަށް މީހުން އެތެރެވާ އަދި ބޭރުވާ ހުރިހާ ޕޮއިންޓެއްގައި މިނިޒާމް ޤާއިމްކުރެވިގެންދާއިރު، ކުރިމަގުގައި އިތުރުވާ އެންޓްރީ އަދި އެގްޒިޓް ޕޮއިންޓްތަކަށްވެސް މިނިޒާމް ފުޅާކުރެވޭނެއެވެ. މިއީ އިންޑިއާ ސަރުކާރުގެ އެހީގައި ޑިޕާޓްމަންޓް އޮފް އިމިގްރޭޝަން އެންޑް އެމިގްރޭޝަންގައި ޤާއިމްކޮށްފައިވާ އެޑްވާންސް ޕެސެންޖަރ އިންފޮރމޭޝަން ސިސްޓަމް އާއި، މިހާރު ބޭނުންކުރަމުންދާ އެކްސްޕެޓްރިއެޓް އޮންލައިން ސަރވިސަސް ސިސްޓަމްއާއި އިންޓަރފޭސް ކުރެވޭ ގޮތަށް ފަރުމާކުރެވިފައިވާ ނިޒާމެކެވެ.

މިމެމޮރަންޑަމް އޮފް އިންޓެންޝަންގައި ސޮއިކުރެއްވުމަށްފަހު މިރަސްމިއްޔާތުގައި ވާހަކަފުޅު ދައްކަވަމުން މިނިސްޓަރ އޮފް ޑިފެންސް އެންޑް ނޭޝަނަލް ސެކިއުރިޓީ ކާނަލް (ރޓ) މުޙައްމަދު ނާޒިމް ވިދާޅުވީ މިނިޒާމަކީ ރާއްޖެއަށް ހުރިހާ ގޮތަކުންވެސް ވަރަށް ބޭނުންތެރި އަދި އެހާމެ މުހިއްމު އަދި އޭގެ ސަބަބުން ރައްޔިތުންނަށް ގިނަގުނަ ފައިދާތަކެއް ލިބިގެންދާނެ ނިޒާމެއް ކަމުގައެވެ. އިތުރަށް ވާހަކަފުޅު ދައްކަވަމުން އެމަނިކުފާނު ވިދާޅުވީ މިބޯޑަރ ކޮންޓްރޯލް ނިޒާމުން އެއްކުރެވޭ މަޢުލޫމާތު ދިވެހި ސަރުކާރުން ބޭނުންވާ ފަރާތްތައް ފިޔަވައި އިތުރު ފަރާތަކާއި ހިއްސާކުރަން ނުޖެހޭނެ ކަމަށެވެ. ދިވެހި ދައުލަތުން އެއްވެސް ޚަރަދެއް ނުކޮށް ޤާއިމްކުރެވޭ މިނިޒާމުގެ ސަބަބުން ރާއްޖޭގެ ސަލާމަތާ ރައްކާތެރިކަން އަދި އިޤްތިޞާދީ އަދި އިޖުތިމާޢީ ދުޅަހެޔޮކަން އެތައް ގުނައެއް އިތުރުވެގެންދާނެކަމަށްވެސް ޑިފެންސް މިނިސްޓަރ ވިދާޅުވިއެވެ. ކުރިއަށް އޮތް ތިން މަސްދުވަހުގެ ތެރޭގައި މަސައްކަތް ނިންމާ މިއަހަރުގެ ޖޫންމަހުގެ ނިޔަލަށް ރާއްޖޭގެ އާ ބޯޑަރ ކޮންޓްރޯލް ނިޒާމުގެ ޚިދުމަތް ފެށޭނެކަމަށް އުއްމީދުކުރައްވާކަމަށްވެސް މިނިސްޓަރ ވިދާޅުވިއެވެ.

މިރަސްމިއްޔާތުގައި ވާހަކަފުޅު ދައްކަވަމުން އެމެރިކާ ސަރުކާރުން ސްރީލަންކާއަށާއި ރާއްޖެއަށް ކަނޑައަޅާފައި ހުންނަވާ އެމްބެސެޑަރ ހަރ އެކްސެލެންސީ މިޝެލް ޖޭ ސިސޮން ވިދާޅުވީ އެމެރިކާއިން ރާއްޖޭގައި ޤާއިމްކޮށްދޭ ބޯޑަރ ކޮންޓްރޯލް ނިޒާމަކީ ރާއްޖޭގެ ބޭނުންތަކަށް ޚާއްޞަކޮށް ޑިޒައިންކުރެވިފައިވާ ނިޒާމެއް ކަމަށެވެ. އަދި ޓެރަރިޒަމްގެ ނުރައްކަލުން ސަލާމަތްވުމަށް ދެޤައުމު ގުޅިގެން ކުރަމުންދާ މަސައްކަތަށް މިނިޒާމުގެ ސަބަބުން އިތުރު ކުރިއެރުމެއް ލިބިގެންދާނެކަމަށްވެސް ވިދާޅުވިއެވެ.

މެމޮރަންޑަމް އޮފް އިންޓެންޝަންގައި ސޮއިކުރުމަށް މިއަދު މިބޭއްވުނު ރަސްމިއްޔާތުގައި ޑިޕާޓްމަންޓް އޮފް އިމިގްރޭޝަން އެންޑް އެމިގްރޭޝަންގެ އިތުރުން މޯލްޑިވްސް ނޭޝަނަލް ޑިފެންސް ފޯސް، މޯލްޑިވްސް ޕޮލިސް ސަރވިސް އަދި މޯލްޑިވްސް ކަސްޓަމްސް ސަރވިސްގެ އިސްވެރިން ބައިވެރިވެވަޑައިގެންނެވިއެވެ.